Sharia meaning of Word Shahid and Shaheed

حوالہ؛ صحیح البخاری رقم الحدیث ۴۸۳۸/۲۱۲۵ دارارقم بیروت 

حضرت جبیر بن معطم رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا میرے پانچ اسماء ہیں؛ میں محمد ہوں اور میں احمد ہوں اور میں ماحی (شرک اور کفر کو مٹانے والا) ہوں، اللہ میرے سبب سے کفر کو مٹائے گا اور میں حاشر ہوں، میرے قدموں میں لوگوں کا حشر کیا جائے گا اور مین عاقب ہوں (سب نبیوں کےبعد آنے والا)۔ 

اور اللہ تعالیٰ نے آپ کا نام رؤف و رحیم رکھا ہے۔ (التوبہ ۱۲۸ )۔ 

علامہ ابوبکر بن العربی نے احکام القرآن میں الاحزاب ۱۳ کی تفسیر میں آپ کے سڑسٹھ (۶۷) اسماء گرامی ذکر کیئے ہیں اور حضرت ابن عباس رضی اللہ عنہ سے روایت ہے کہ سیدنا محمد صلی اللہ علیہ وسلم کے ایک سو اسی اسماء ہیں۔ 

اس آیت میں نبی صلی اللہ علیہ وسلم کو شاہد فرمایا ہے، اور شاہد کا معنی ہے گواہی دینے والا، اور نبی صلی اللہ علیہ وسلم کے شاہد ہونے کے چار محمل ہیں، ایک محمل یہ ہے کہ آپ اپنی اُمت کے حق میں قیامت کے دن گواہی دیں گے، دوسرا یہ ہے کہ آپ لاالٰہ الااللہ کی گواہی دینے والے ہیں اور تیسرا یہ کہ آپ دنیامیں امور آخرت کی گواہی دیں گے اور چوتھا یہ کہ آپ اعمالِ امت پر شاھد ہیں۔ نبی صلی اللہ علیہ وسلم جو اپنی اُمت کے حق میں گواہی دیں گے اس کا ذکر اس آیت میں ہے ؛ 

حضرت ابوسعید خدری رضی اللہ عنہ بیان کرتے ہیں کہ رسول اکرم صلی اللہ علیہ وسلم نے فرمایا: قیامت کے دن ایک نبی آئے گااور اس کے ساتھ ایک شخص ہوگا،اور ایک نبی آئے گا اور اسکے ساتھ دو شخص ہوں گے، اور ایک نبی آئے گا اسکے ساتھ زیادہ لوگ ہوں گے، اس سے کہاجائے گا کیا تم نے اپنی قوم کو تبلیغ کی تھی؟ وہ کہے گا ہاں! پھر اسکی قوم کو بلایا جائےگا اور اس سے پوچھا جائے گاکیا انہوں نے تم کو تبلیغ کی تھی، وہ کہیں گے نہیں! پھر اُس نبی سے کہا جائے گاتمہارے حق میں کون گواہی دے گا؟ وہ کہیں گے (سیدنا) محمد صلی اللہ علیہ وسلم کی امت، پھر (سیدنا) محمد صلی اللہ علیہ وسلم کی امت کو بلایا جائے گا، اور کہاجائےگا کہ کیا انہوں نے تبلیغ کی تھی؟ وہ کہیں گے ہاں! پھر کہاجائے گا تم کو اس کا کیسے علم ہوا؟ وہ کہیں گے ہمارے نبی صلی اللہ علیہ وسلم نے ہمیں یہ خبر دی تھی کہ (سب) رسولوں نے تبلیغ کی ہے، اور یہ اس آیت کی تفسیر ہے۔ 

حوالہ؛ سنن کبریٰ للنسائی ج ۶ ص ۲۹۲ دارالکتب العلمیہ بیروت ۱۴۱۱ ھ 

اس آیت اور اس حدیث میں یہ دلیل ہے کہ ہمارے نبی صلی اللہ علیہ وسلم تمام امتوں کے احوال پر مطلع ہیں اور آپ اپنی امت کے اعمال کا بھی مشاہدہ فرماتے ہیں کیونکہ آپ اپنی امت کی گواہی دیں گے اور گواہی میں اصل یہ ہے کہ مشاہدہ کرکے اور دیکھ کر گواہی دی جائے، اور اس کی تائید اس حدیث سے ہوتی ہے۔ 

حضرت عبداللہ بن مسعود رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: اللہ کے کچھ فرشتے سیاحت کرنے والے ہیں وہ مجھے امت کا سلام پہنچاتے ہیں اور رسول اللہ صلی اللہ علیہ وسلم نے فرمایا میری حیات تمہارے لیئے بہتر ہے تم باتیں کرتے ہو اور تمہارے لیئے حدیث بیان کی جاتی ہے اور میری وفات (بھی) تمہارے لیئے بہتر ہے ، تمہارے اعمال مجھ پر پیش کیئے جاتے ہیں ۔ میں جو نیک عمل دیکھتا ہوں اس پر اللہ تعالیٰ کی حمد کرتا ہوں، اور میں جو برا عمل دیکھتا ہوں اس پر اللہ تعالیٰ سے استغفار کرتا ہوں۔ 

حوالہ۔ البدایہ والنہایہ جلد ۴ ص ۲۵۷ طبع جدید ، دارالفکر بیروت ۱۴۱۹ ھ 

رسول اللہ صلی اللہ علیہ وسلم کا اللہ تعالیٰ کی توحید اور ذات وصفات پر شاھد ہونا۔ 

شاہد ہونے کا دوسرا محمل یہ ہے کہ ہمارے نبی سیدنا محمد مصطفیٰ علیہ التحیہ والثناء ، اللہ تعالیٰ کی توحید پر اور (لاالٰہ الااللہ) پر شاہد ہیں اور آپ نے امت کو بھی یہ حکم دیا ہے کہ اللہ کی توحید اور اسکی ذات وصفات کی شہادت دیں۔ اور آپ جو اللہ تعالیٰ کی توحید اور اسکی ذات وصفات کی شہادت دیتے ہیں یہ آپ کی خصوصیت نہیں بلکہ تمام انبیاء اور رسل نے اور ان کی امتوں نے اللہ تعالیٰ کی توحید اور اسکی ذات اور صفات کی شہادت دی ہے، اور آپ کی اور باقی نبیوں اور رسولوں کی شہادت میں فرق یہ ہے کہ تمام نبیوں اور رسولوں نے اللہ کی توحید اور اسکی ذات وصفات کی شہادت فرشتوں سے سن کر دی ہے اور آپ نے اللہ تعالیٰ کی توحید اور اسکی ذات وصفات کی شہادت دیکھ کر اور مشاہدہ کرکے دی ہے، بلکہ ساری کائنات اللہ کے واحد ہونے کی شہادت سن کردیتی ہے اور آپ تنہا اور واحد ایسے شاھد ہیں جس نے اللہ کو دیکھ کر اس کے واحد ہونے کی شہادت دی ہے، یہی وجہ ہے کہ اللہ تعالیٰ نے تمام نبیوں میں صرف آپ کو (شاھد) فرمایا ہے ۔ آپ نے جس چیز کی بھی شہادت دی ہے وہ دیکھ کر اور مشاہدہ فرما کرشہادت دی ہے، کرسی اور عرش ہو یا لوح وقلم ہو، فرشتے ہوں یا جنات، جنت ہو یا دوزخ ہو، آپ نے ہرچیز کو دیکھ کر اور مشاہدہ کرکے شہادت دی ہے اور جیسے آپ شاہد ہیں کائنات میں ایسا کوئی دوسرا شاہد نہیں ہے۔ 

امام رازی نے کہا ہے کہ اللہ تعالیٰ نے آپ کو توحیدکا مدعی نہیں بنایا کیونکہ جس چیز کا دعویٰ کیا جاتا ہے وہ خلاف ظاہر ہوتی ہے اور اللہ تعالیٰ کی توحید تو اس کائنات میں ظاہر ہے بلکہ اظہر من الشمس ہے۔(تفسیر کبیر جلد 9 ص 173) میں کہتا ہوں کہ اگر توحید ظاہر اور اظہر من الشمس ہوتی تو ساری دنیا اس کی منکر کیوں ہوتی اور اسکو منوانے کے لیے اتنے نبیوں اور رسولوں کو کیوں مبعوث کیا جاتا اور اس قدر دلائل اور معجزات کیوں پیش کیئے جاتے ! حق یہ ہے کہ اس کی توحید مخفی تھی اس کو نبیوں اور رسولوں نے ظاہر کیا اور سب سے زیادہ ہمارے نبی صلی اللہ علیہ وسلم نے اس کی توحید کو آشکارا کیا، اللہ تو ہمیشہ سے واحد تھا لیکن اس کی توحید کے اتنے ماننے والے نہ تھے آپ نے اللہ کے واحد ہونے کی شہادت دی تو کائنات کی ہرحقیقت نے اللہ کو واحد کہا۔ آپ نے اللہ کی توحید کی شہادت دی اور اللہ نے آپ کو رسالت کی شہادت دی سو فرمایا؛۔ 

ترجمہ؛ تم (بھی ان کی رسالت کے اقرار پر) گواہ ہوجاؤ اور میں (بھی) تمہارے ساتھ گواہوں میں سے ہوں۔ (آل عمران۔ ۸۱ )۔ 

ترجمہ ؛ اور اللہ خوب جانتا ہے کہ بے شک آپ ضرور اس کے رسول ہیں۔ (المنافقون۔۱)۔ 

اور شاہد کا تیسرا محمل یہ ہے کہ آپ دنیا میں امور آخرت پر شاہد ہیں آپ جنت کے اور دوزک کے شاہد ہیں اور میزان اور صراط کے شاہد ہیں، آپ نے جس کے جنتی ہونے کی شہادت دی اس پر جنت واجب ہوگئی اور جس کے دوزخی ہونے کی شہادت دی اس پر دوزخ واجب ہوگئی، آپ نے دس صحابہ کا نام لے کرفرمایا کہ وہ جنت میں ہیں۔ اس سلسلہ میں یہ حدیث ہے؛۔ 

حضرت عبدالرحمٰن بن عوف رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا ابوبکر جنت میں ہیں، عمر جنت میں ہیں، عثمان جنت میں ہیں، علی جنت میں ہیں، طلحہ جنت میں ہیں، زبیر جنت میں ہیں، عبدالرحمٰن بن عوف جنت میں ہیں، سعد بن ابی وقاص جنت میں ہیں، سعید بن زید جنت میں ہیں، ابو عبیدہ بن الجراح جنت میں ہیں۔ 

سنن الترمذی رقم الحدیث ۔ ۳۷۴۷ مسند احمد جلد ۱ ص ۱۹۳، مسند ابويعلي رقم الحديث ۸۳۵، صحيح ابن حبان رقم الحديث، ۷۰۰۲ 

حضرت علی رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کے منہ سے سنا ہے وہ فرمارہے ہیں کہ طلحہ اور زبیر دونوں جنت میں میرے پڑوس میں ہوں گے۔ 

سنن الترمذی رقم الحدیث ۔ ۳۷۴۱، المستدرک جلد ۳ ص ۳۶۵ . کتاب الضعفا للعقيلي جلد ۴ ص ۳۹۴ الکامل لابن عدي جلد ۷ . ص ۲۴۸۹ 

حضرت زبیر رضی اللہ عنہ بیان فرماتے ہیں کہ نبی اکرم صلی اللہ علیہ وسلم نے فرمایا طلحہ نے اپنے لیئے جنت کو واجب کرلیا۔ سنن الترمذی رقم الحدیث 3738۔ 1692 

حضرت جابر بن عبداللہ رضی اللہ عنہ بیان کرتے ہیں کہ میں نے رسول اکرم صلی اللہ علیہ وسلم کو یہ فرماتے ہوئے سنا کہ جو شخص شہید کو زمین پر چلتے پھرتے دیکھنے میں خوش ہو وہ طلحہ بن عبید اللہ کو دیکھ لے۔ 

سنن الترمذی 3739۔ سنن ابن ماجہ 145، حلیۃ الاولیاء جلد 3 ص 100۔ 

اسی طرح جن لوگوں کے متعلق ہمارے آقا صلی اللہ علیہ وسلم نے دوزخی ہونے کی شہادت دی ان کا دوزخی ہونا واجب ہے، اس سلسلہ میں یہ احادیث ہیں:۔ 

حضرت ام المؤمنین عائشہ صدیقہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا میں نے دیکھا جہنم کی بعض آگ بعض کو کھا رہی تھی، اور میں نے عمرو بن لحی کو دیکھا وہ دوزخ میں اپنی آنتیں گھسیٹ رہاتھا۔ اور یہ وہ پہلا شخص ہے جس نے بتوں کے لیئے اونٹنیوں کو نامزد کیا تھا۔ 

صحیح البخاری رقم الحدیث 4624 ، صحیح مسلم رقم الحدیث بلاتکرار؛ 901 رقم الحدیث المسلسل 2057۔ 

حضرت جابر رضی اللہ عنہ نے ایک طویل حدیث کے آخر میں روایت کیا ہے کہ رسول اللہ صلی اللہ علیہ وسلم نے فرمایامیں نے دوزخ میں ایک ڈھال والے شخص کو دیکھا جو اپنی ڈھال سے حجاج کے کپڑے چرایا کرتا تھا اگر کسی کو پتا چل جاتا تو وہ کہتا یہ کپڑا میری ڈھال میں اٹک گیا تھا، اور جب وہ شخص غافل ہوتا تو وہ کپڑا لے جاتا، اور میں نے دوزخ میں ایک عورت کو دیکھا جس نے بلی کو باندھ کررکھا تھا، اس کو کچھ کھانے کو دیا اور نہ اس کو آزاد کیا کہ وہ زمین پر پڑی ہوئی کوئی چیز کھا لیتی حتیٰ کہ وہ بلی بھوک سے مرگئی۔ 

صحیح مسلم رقم الحدیث بلاتکرار 904 رقم الحدیث المسلسل ، 2067 سنن ابوداؤد رقم الحدیث 1178 

رسول اللہ صلی اللہ علیہ وسلم کا اعمال امت پر شاہد ہونا 

اور یہ رسول اللہ صلی اللہ علیہ وسلم کے شاہد ہونے کا چوتھا محمل ہے:۔ 

حضرت عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا؛۔ اللہ کے کچھ فرشتے سیاحت کرتے ہیں جو میری امت کی طرف سے سلام پہنچاتے ہیں اور رسول اللہ صلی اللہ علیہ وسلم نے فرمایا میری زندگی تمہارے لیئے بہتر ہے تم حدیث بیان کرتے ہو اور تمہارے لیئے حدیث بیان کی جاتی ہے اور وفات (بھی) تمہارے لیئے بہتر ہے مجھ پر تمہارے اعمال پیش کیئے جاتے ہیں جو نیک عمل دیکھتا ہوں ان پر اللہ کی حمد کرتا ہوں اور میں جو برے عمل دیکھتا ہوں ان پر اللہ سے استغفار کرتا ہوں۔ 

اگر یہ کہا جائے کہ نبی صلی اللہ علیہ وسلم اپنے زمانہ کے امتیوں کے اعمال پر شاہد تھے تو پھر تویہ بات بالکل واضح ہے اور اگر یہ کہا جائے کہ آپ بعد کے امتیوں کے اعمال پر بھی شاہد تھے تو اس میں ییہ اشکال ہے کہ حضرت ابوبکر ، حضرت انس ، حضرت حذیفہ ، حضرت سمرہ اور حضرت ابوبردہ نے نبی صلی اللہ علیہ وسلم سے روایت کیا ہے کہ میرے اصحاب میں سے کچھ لوگ حوض پر وارد ہوں گے ، حتیٰ کہ میں ان کو دیکھ کر اور پہچان کر کہوں گا اے رب میرے میرے اصحاب! پس مجھ سے کہا جائے گا آپ ازخود نہیں جانتے کہ انہوں نے آپ کے بعد دین میں کیا نئے کام نکالے ہیں! ہاں اسکے جواب میں یہ کہا جاسکتا ہے کہ آپ کو یہ توعلم تھا کہ آپ کے بعد آپ کی امت کے لوگ کیا نیک کام کریں گے اور کیا برے کام کریں گے ، لیکن آپ کو ان معیّن لوگوں کا علم نہیں تھا کہ کون نیک کام کرنے والے ہیں اور کون برے کام کرنے والے ہیں تاکہ اس حدیث اور مسند بزار کی عرض اعمال والی حدیث میں تطبیق ہوجائے، اس کا دوسرا جواب یہ دیا گیا ہے کہ آپ کو نیکی کرنے والے اور گناہ کرنے والے معین لوگوں کا بھی علم تھا لیکن قیامت کے دن آپ بھول گئے، اور بعض صوفیاء کرام نے یہ اشارہ کیا ہے کہ اللہ تعالیٰ نے آپ کو بندوں کے اعمال پر مطلع فرما دیا تھا۔ اور آپ نے ان کے اعمال کو دیکھات ھا اس لیئے آپ کو شاہد فرمایا۔ 

مولانا جلال الدین رومی قدس سرہ العزیز نے مثنوی میں فرمایا۔ 

درنظر بودش مقامات العباد 

زان سبب نامش خدا شاہد نہاد 

آپ کی نظر میں بندوں کے مقامات تھے۔ اس وجہ سے اللہ تعالیٰ نے آپ کا نام شاہد رکھا۔ 

روح المعانی جز 22 ص 65 مطبوعہ دارالفکر بیروت۔ 

ہمارے نزدیک اس اشکال کا صحیح جواب یہ ہے کہ اس حدیث میں علم کی نفی نہیں ہے درایت کی نفی ہے کیونکہ فرشتے یہ نہیں کہیں گے (انک لاتعلم) بلکہ یہ کہیں گے (انک لاتدری) ، اور درایت کا معنی ہے کسی چیز کو اپنی عقل اور قیاس سے جاننا یعنی آپ ان لوگوں کے مرتد ہونے کو اپنی عقل اور اپنے قیاس سے نہیں جانتے بلکہ اللہ تعالیٰ کے دیئے ہوئے علم سے جانتے ہیں، باقی رہا یہ کہ پھر آپ نے یہ کیوں فرمایا کہ یہ میرے اصحاب ہیں اسکا جواب یہ ہے کہ نبی صلی اللہ علیہ وسلم کا انہیں صحابی فرمانا عدم علم کی وجہ سے نہیں تھا بلکہ اس لیئے تھا کہ پہلے ان کو یہ امید ہو کہ ان کو پانی ملے گا اور پھر جب ان کو حوض سے دور کیا جائے گا اور ان کی امید ٹوٹے گی تو ان کو زیادہ عذاب ہوگا، دوسری وجہ یہ بھی ہوسکتا ہے کہ اصحابی سے پہلے ہمزہ استفہام کا محذوف ہو، یعنی کیا یہ میرے صحابی ہیں؟ جن کے چہرے سیاہ، اعمال نامے بائیں ہاتھ میں، آنکھیں نیلی، چہرے تاریک اور مرجھائے ہوئے ہیں، یہ میرے صحابہ ہیں؟ میرے اصحاب کے تو چہرے اور ہاتھ پیر سفید اور روشن ہیں ان کے اعمال نامے ان کے دائیں ہاتھ میں ہیں اور ان کے چہرے کھلے ہوئے اور شاداب ہیں۔ قرآن مجید اور احادیث صحیحہ میں مومنوں اور کافروں کی جو علامتیں بیان کی گئی ہیں کہ ان کے چہرے سفید ہوں گے اور اعمال نامے دائیں ہاتھ میں ہوں گے اور کافروں کے چہرے سیاہ اور اعمال نامے ان کے بائیں ہاتھ میں ہوں گے ان علامتوں سے میدان محشر میں موجود ہرشخص کو علم ہوگا کہ مومن کون ہے اور کافر کون ہے، تو یہ کیسے ممکن ہے کہ رسول اللہ صلی اللہ علیہ وسلم کو یہ علم نہ ہو کہ کون آپ کا صحابی ہے اور کون نہیں ہے۔ علاوہ ازیں رسول اللہ صلی اللہ علیہ وسلم پر دنیا میں امت کے اعمال پیش کیئے جاتے ہیں سو آپ کو علم تھا کہ کون ایمان پر قائم رہا اور کون مرتد ہوگیا اور سب سے بڑھ کر یہ کہ آپ تو دنیا میں بیان فرما رہے ہیں کہ میرے حوض پر ایسے ایسے لوگ آئیں گے سو آخرت کا علم تو دور کی بات ہے آپ نے دنیا میں ہی اپنے علم کی وسعت کا اظہار فرمادیا ہے۔