Hadith-Kissing Hajrel Aswad & kissing of Graves {urdu}

بخاری شریف میں ہے  

ابوالشعثاء نے کہا۔ کون ہے؟ جو بیت اللہ کے کسی حصہ سے پرہیز کرے اور معاویہ سب ارکان کو بوسہ دیتے تھے۔ اس پر ان سے ابن عباس نے کہا کہ ہم ان دونوں رکنوں (عراقی و شامی) کو بوسہ نہیں دیتے۔ تو معاویہ نے ان سے کہا۔ بیت اللہ کا کوئی حصہ چھوڑے جانے کے لائق نہیں۔ اور ابن زبیر سب ارکان کو بوسہ دیتے تھے (رضوان اللہ تعالیٰ علیھم اجمعین)۔

 

یعنی استلام کے معنی پتھر چھونے اور اسے بوسہ دینے کے ہیں۔ اس کا مادہ (سَلِمۃ) ہے۔ جس کے معنی پتھر کے ہیں۔ استلام عام ہے اور تقبیل خاص ہے ۔ استلام لکڑی یا ہاتھ سے چھونے کو بھی کہتے ہیں ۔ کعبہ کے چار رکن ہعنی کونے ہیں شرقی جنوبی کو رکن اسود کہتے ہیں۔ اسی میں حجر اسود ہے۔ غربی جنوبی کو یمانی کبھی تغلیبا دونوں کو یمانیین کہا جاتا ہے۔ غربی شمالی کو شامی۔ شرقی شمالی کو عراقی۔ کبھی تغلیبا ان دونوں کو شامیین بھی کہہ دیتے ہیں۔ رکن اسود میں دو فضیلت ہے۔ یہ قواعد ابراہیم پر بھی ہے اور اس میں حجر اسود بھی ہے۔ اسی لیئے اس کی تقبیل ہے ۔ اور ممکن نہ ہو تو استلام۔ رکن یمانی قواعد ابراہیمی پر ہے۔ اس میں صرف ایک فضیلت ہے ۔ اسلیئے اس کا صرف استلام ہے ۔ ہاتھ سے چھو کر ہاتھ کو بوسہ دے لے۔ تقبیل یا لکڑی سے چھونا نہیں۔ رکن عراقی اور شامی چونکہ حقیقت میں رکن نہیں بلکہ درمیان بیت اللہ پر ہیں اسلیئے نہ ان کا بوسہ لینا اور نہ چھونا ہے۔ بلکہ مکروہ ہے۔  

حضرت معاویہ کا مذہب یہی تھا۔ کہ سب کو بوسہ دینا چاہیئے۔ رہ گئے حضرت عبداللہ بن زبیر رضی اللہ عنہ تو چونکہ انہوں نے کعبۃ اللہ شریف کا وہ حصہ جو قریش نے حطیم میں چھ یا سات ہاتھ چھوڑدیا تھا۔ کعبہ کی جدیدی تعمیر میں شامل کرکے رکن عراقی اورشامی کو بھی قواعد ابراہیم پر بنایا تھا۔ اسلیئے اسے بھی وہ فضیلت مل گئی جو رکن یمانی کو حاصل تھی اسلیئے وہ ان دونوں ارکان کا بھی استلام کیا کرتے تھے۔